God nok

I dag hadde det dumpa ner eit vekeblad i postkassa mi. Eit slikt glansa og fint. Det var meint som reklame for å få meg til å abonera. Utsida bar bodskap om å kunna fortelja meg om dei hottaste trendane denne hausten.
Eg la bladet til sides, vurderte å arkivera det i den blå dunken for papir.
Men så pakka eg det opp, og tok det med inn til godstolen saman med ein kaffikopp.
Kom nokså fort til side 54, ikkje mykje anna enn informasjon til meg om korleis eg måtte gjera, og kva eg måtte kjøpa denne hausten for å "henge med"

Men på side 54 stoppa eg opp " 7 tips for å elske livet du allerede har" Store ord det, tenkte eg.
Etter å ha skumma gjennom dei fyrste tipsa kom eg til det som pludseleg fekk meg til å stoppa litt. "Dei små glimta av kvardagslykke bør du ta vare på, morgonkaffi, kjensla av nyvaska sengetøy" Eg hadde heilt gløymt av kor godt det er få sitja litt i fred og ro å drikka morgonkaffi fordi eg kom meg opp før dei andre. Eller kor godt det kan vera å krypa ned i reint sengetøy. For eigen del kan eg tilføra ein del fleire kvardags augneblink som gjev kvardagslykke.

Gå ein liten runde i hagen før leggetid og nyta at den er frodig og grøn.
Finna ein sommarfugl på eit blad.
Oppdaga at sjølv om hausten er godt igang så blømer rosene.

La kjensla av å vera god nok sige inn i takt med songen og tonane til Anne Grete Preus
Anne Grete Preus "God nok"

Nei, det vert nok ikkje noko glansa vekeblad i postkassa mi regelmessig. For mange sider i bladet fortalde meg korleis eg burde vera. Men side 54, den skal eg riva ut og ta vare på.